Heimsókn frá Frankfurt

Undanfarin 3 ára hefur JCI Esja fengið góða heimsókn frá þýskum vinum.  Þetta árið var ekkert öðruvísi og mættu 11 vinir á þorrablót félagsins.

Heimsókn til Esjufélaga
Ferðin byrjaði ekki vel fyrir þýsku vinina, en vegna veðurs hér heima tafðist flugið um 4 tíma.  Ráðgert hafði verið að fara með þá í íslenska sundlaug, en fresta varð öllum sundferðum vegna veðurs.  Því var haldið beint heim til JCI Esju félaga, Brynju og Kobba, þar sem þeirra beið heimalagaður matur.   Þótti það einstaklega vel heppnað og var haldið áfram að spjalla fram á nótt.

Gönguferð
Föstudags morgunn var tekinn í að skoða miðbæ Reykjavíkur, veðrið var ekki beint göngugörpunum í hag.  Komust menn við illan leik inn í Hallgrímskirkju, þar sem gestirnir skoðuðu kirkjuna á alla kanta.   Síðan var haldið í þýska sendiráðið þar sem sendiherrann tók á móti nokkrum okkar.

Eftir heimsókn í sendiráðið var farið á þann fræga veitingastað Bæjarins bestu, en frægð hans hafði náð eyrum þjóðverjanna. Þrátt fyrir slagveðrið var ákveðið að borða úti.

Bláalónið
Seinni partinn á föstudaginn var haldið í Bláalónið. Þrátt fyrir kolvitlaust veður, var ákveðið að fara í lónið.  Vegagerðin sagði veginn færan og því var þetta bara bara spurning um að fara varlega.  Lónið var mjög skemmtilegt í þessu veðri, þó svo að það væri frekar kalt.

Ferðin heim var einnig mjög skemmtileg reynsla fyrir þýsku gestina, þar sem rúta hafði fokið út af veginum.  Það minnkaði ekki spennuna.

Ferð um Suðurlandið
Á laugardags morguninn var farið í ferð um Suðurlandið.  Lagt var af stað í blíðskaparveðri og upp í Hellisheiðarvirkjun, þar sem Orkuveitan tók á móti gestum.

Á Hvolsvelli var svo snætt og haldið áfram inn að Seljalandsfossi.  Fossinn var gríðarlega fallegur, frosinn og í fallegri birtu.  Eingöngu 3 komust bak við fossinn með illum leik, en mjög hættulegt var að fara leiðina, þar sem glerhált var að baki honum.

Eftir Seljalandsfoss var haldið í áttina að Þórsmörk, þar sem 2 bílar festust við mikil fagnaðarlæti gestanna.  Eftir klukkustundar mokstur, var fyrir bílinn laus og hinum var kippt upp með spotta.  Ekki þótti verra hjá kvenkynsfélögum JCI Frankfurt, að það var eini kvennbílstjórinn sem festist ekki og leiddi hópinn í þessum hluta ferðarinnar.

Ekki tók betra við þegar dekk sprakk á einum bílnum, en með skipulögðu hópstarfi tók það lítinn tíma að skipta um dekk.

Hérna var komið að því að skipta hópnum upp í 2 hópa.  Margir gestanna höfðu komið hingað áður og höfðu því skoðað Gullfoss og Geysi, þeir vildu því skoða svartar strendur Íslands.   Hinn hópurinn hélt á Gullfoss og Geysi.

Þorrablótið
Um kvöldið var svo þorrablótið, en 40 manns höfðu skráð sig til leiks.  Þorrablótið er einn af hápunktum í dagskrá Esjunnar, þar sem alltaf er gríðarlega skemmtilegt og mikið um að vera.  Blótið var til klukkan 12, en þá var haldið í Hellusund þar sem fjörið hélt áfram.

Heimferð
Þýsku vinir okkar héldu svo heim á leið klukkan 4 um nóttina.  Ferðin gekk vel og allir komust heim á leið og með allt nema 1-2 jakka sem týndust.

Athugasemdir

[Jenný Jóakimsdóttir (IP-tala skráð) 15.2.2008 kl. 23:34]

Ferlegt að missa af þessu.. en svona er þetta maður getur ekki verið allstaðar..